कालीकोट जिल्लाको रास्कोट नगरपालिकास्थित प्रादेशिक रणनीतिक अस्पतालमा उपचाररत सुत्केरी श्रीमती बिनिता प्याकुरेलको अवस्था जटिल बनेपछि थप उपचारका लागि हेलिकप्टरमार्फत उद्धार गरी सुर्खेत पठाइएको छ ।
सान्नीत्रिवेणी गाउँपालिका–७ निवासी नहकुल सिम्खाडाकी २१ वर्षीया श्रीमती बिनिता प्याकुरेलको लामो समयसम्म प्रसूति व्यथा लाग्दा पनि प्रसव प्रक्रिया अघि नबढेपछि बिहीबार राष्ट्रपति महिला उत्थान कार्यक्रमअन्तर्गत हवाई उद्धार गरिएको हो ।
अस्पतालमा उपचारका क्रममा बिनिताको प्रसूति व्यथा लामो समयसम्म अघि नबढ्नुका साथै गर्भमा रहेको बच्चाको मुटुको धड्कनसमेत अनियन्त्रित देखिएपछि आमा र बच्चा दुवैको स्वास्थ्य जोखिममा परेको थियो ।
अवस्था जटिल बन्दै गएपछि तत्काल थप उपचार आवश्यक देखिएकाले हवाई उद्धार गरिएको प्रादेशिक रणनीतिक रास्कोट अस्पतालका स्वास्थ्य बिमा प्रमुख तुलराज उपाध्यायले बताए |
