मंसिर २०, काठमाडौ ।
नेपाल कम्युनिष्ट पार्टी नेकपाको सचिवालय बैठक सकिएको छ । प्रधानमन्त्री निवास बालुवाटारमा अध्यक्षद्वय केपी शर्मा ओली र पुष्पकमल दाहाल प्रचण्डको अध्यक्षतामा सम्पन्न बैठकले अध्यक्षद्वयका बैठकमा प्रस्तुत भएका प्रस्ताव स्थायी कमिटी बैठकमा पेश गर्ने निर्णय गरेको छ ।
ठकपछि पार्टी प्रवक्ता नारायणकाजी श्रेष्ठ प्रकाशले आजको बैठकमा अध्यक्षद्वयका प्रस्तावमा छलफल भएको र सचिवालयमा प्रस्तुत प्रस्तावलाई छलफलका लागि स्थायी कमिटी बैठकमा लैजाने निर्णय भएको जानकारी दिए । त्यस्तै सहमति कायम गर्नका लागि आवश्यक परेमा स्थायी कमिटीको बैठककै समयमा पनि छलफललाई निरन्तरता दिने निर्णय भएको श्रेष्ठको भनाइ छ ।
सचिवालय बैठकले पूर्व निर्धारित समयअनुसार भोलि दिउँसो १ बजे स्थायी कमिटी बैठक बोलाउने निर्णय गरेको छ । ओली अनुपस्थित भएको मंसिर १७ गतेको सचिवालय बैठकले भोलि स्थायी कमिटी बैठक बोलाउने निर्णय गरेको थियो । यसअघि नै मंसिर २५ गते केन्द्रीय कमिटी बैठक तय भएको छ ।
