मंसिर १४, बैतडी ।
बैतडीको सिगास गाउँपालिकाकी १८ वर्षीया किशोरीको बलात्कार घट्ना गाउँमै मिलाएको आरोपमा वडा अध्यक्षसहित ४ जनालाई प्रहरीले प्रकाउ गरेको छ । सिगास गाउँपालिकाका वडा नम्बर ३ का अध्यक्ष शेरसिंह धामी, सोहि स्थानकै राजेन्द्र धामी, नरेन्द्र धामी र गोपाल धामीलाई बैतडी प्रहरीले शनीबार साँझ नियन्त्रणमा लिएको हो ।
वडा नम्बर ३ का ४ जनालाई नियन्त्रणमा लिएको जिल्ला प्रहरी प्रमुख प्रहरी नायब उपरीक्षक नारायण प्रसाद अधिकारीले बताए । यसअघि बिहीबार सोहि घट्नामा संलग्न भएको आरोपमा प्रहरीले सोहि ठाउँकै मनोज सिंह धामी र अमर धामीलाई नियन्त्रणमा लिएको थियो ।
उनीहरुमाथि अदालतबाट म्याद थप गरेर अनुसन्धान गरिरहेको प्रहरीले जनाएको छ । बलात्कारको घट्नाका मुख्य आरोपी दिपक सिंह धामी भने फरार रहेको प्रहरीले बताएको छ । उनी केहि समय अघि नै भारत गइसकेका छन् ।
किशोरीमाथि गत जेठमा बलात्कार भएको थियो । असार १४ गते गाउँमै १ तोला सुन किशोरीलाई दिने भन्दै तमसुक बनाएर गाउँमै मिलापत्र गरिएको थियो । पीडित पक्षलाई सुन नदिएपछि गत बुधबार घट्ना बाहिर आएको हो ।
