कैलालीको गौरीगंगा नगरपालिका-४ स्थित कालिका माध्यमिक विद्यालयका व्यवस्थापन समिति सदस्य देवबहादुर बमविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
सेवाग्राहीलाई थप सेवा सुविधा र पारिश्रमिक दिलाइदिने नाममा दुई लाख रुपैयाँ घूस लिएको अभियोगमा उनीविरुद्ध मंगलबार विशेष अदालत, काठमाडौंमा आरोपपत्र दायर गरिएको हो।
अख्तियारका अनुसार बमले विद्यालय व्यवस्थापन समितिको सदस्यको पदीय हैसियतको दुरुपयोग गर्दै सेवाग्राहीसँग बार्गेनिङ गरेका थिए।
उनले तोकिए बमोजिमको सेवा सुविधा उपलब्ध गराउन समितिबाट निर्णय गराइदिने भन्दै सेवाग्राहीबाट आफ्नो व्यक्तिगत प्रयोजनका लागि दुई लाख रुपैयाँ घूस लिएको अनुसन्धानबाट पुष्टि भएको आयोगले जनाएको छ।
यसअघि सेवाग्राहीको उजुरीका आधारमा अख्तियार दुरुपयोग अनुसन्धान आयोगको कार्यालय, कञ्चनपुरबाट खटिएको टोलीले बमलाई दुई लाख रुपैयाँ घूस लिइसकेको अवस्थामा रङ्गेहात नियन्त्रणमा लिएको थियो।
बमको उक्त कार्य भ्रष्टाचार निवारण ऐन, २०५९ विपरीतको कसुर भएको ठहर गर्दै अख्तियारले दुई लाख रुपैयाँ बिगो कायम गरेको छ।
उनीविरुद्ध सोही ऐनको दफा ३ को उपदफा (१) बमोजिम बिगो बराबर जरिवाना र दफा ३ (१) को देहाय (ग) बमोजिम कैद सजाय मागदाबी गरिएको अख्तियारका प्रवक्ता सुरेश न्यौपानेले जानकारी दिए।